Doğum günü ərəfəsində dəfn edilən şəhid   —  Aprel şəhidinin doğum günüdür 

Bu gün  "Aprel Döyüşləri" zamanı şəhid olan əsgər Mirsalam Cəfərovun doğum günüdür.Yaşasaydı,31 yaşını qeyd edəcəkdi.

Oxu24.com   döyüşlərdə şəhid olmuş gizir Cəfərov Mirsalam Təvəkkül oğlunun keçdiyi döyüş yolunu təqdim edir:

Əvvəlcə şəhidimiz barədə qısa məlumat verək: Mirsalam Təvəkkül oğlu Cəfərov 1994-cü il aprelin 7-də Tovuz rayonunun Bayramlı kəndində anadan olub. Orta məktəbi doğulduğu kənddə bitirdikdən sonra Cəmşid Naxçıvanski adına Hərbi Liseyə qəbul olur. Burada həkim, feldşer fakültəsini gizirlik kursunda bitirib. 2016-cı ilin aprel ayında isə Talış yüksəkliyi uğrunda gedən döyüşlərdə qəhrəmancasına şəhid olub. Mirsalam Cəfərov ölümündən sonra göstərdiyi qəhrəmanlığa görə Azərbaycan Respublikasının Prezidenti İlham Əliyevin sərəncamı ilə “İgidliyə görə” medalı ilə təltif edilib.

Şəhidin anası Qızxanım Cəfərova Mirsalamın ən böyük arzusunun hərbçi olmaqla yanaşı, həm də şərəfli ölüm olduğunu bildirib: “Elə hey deyirdi ki, ana mən küçəmizin yollarını düzəltdirəcəm. Elə bir şəkildə öləcəm ki, dillərə dastan olacam. Elə də oldu… Sonbeşiyim, gözümün nuru, dizimin taqəti balam hər istəyinə olduğu kimi, bu arzusuna da çatdı.

Bala, Mirsalamın döyüş yoldaşları dedi ki, ay ana oğlunuzu necə vətənpərvər böyütmüsünüz. Demək Mirsalam özü hərbi həkim olub. Vəzifəsi yaralıları döyüş meydanından təxliyyə etmək olub. Görəndə ki, yoldaşları qeyri-bərabər döyüşə girir, onda o da silahını işə salıb. Pəncəli Teymurovla birlikdə də aprelin ikisindən üçünə keçən gecə şəhid olub. Bu gün də balamın doğum günüdür ki, məzarı başında qeyd edirəm. Üzülürəm ki, canımdan can itirmişəm. Amma daha çox qürur duyuram, bu gün mənim yüzlərlə Mirsalam kimi balalarım var, Allah hamısını qorusun. Mənim üçün Mirsalam da, o biri şəhid balalarım da ölməyiblər, sadəcə vətənini qorudular”.

Həmçinin oxuyun

Çoxmərtəbəli yaşayış binası yanır  - TƏCİLİ

Nəriman Axundzadə kimin nəvəsidir?Qiyməti,aylıq maaşı,ailəsi...  

Azərbaycanın sağ olan neçə Xalq şairi-yazıçısı var? - SİYAHI

Tanınmış təhsil eksperti Kamran Əsədova cinayət işi açılıb

Mirsalamın qardaşı Mirhəşim Cəfərov, şəhidliyin şərəfli olduğunu, vətən uğrunda canından keçməyin, tanrı dərgahında da ən yüksək pillərdən biri hesab olunduğunu vurğulayıb.

“Tanrı Vətən və torpaq uğrunda şəhid olanları, dərgahına sorğusuz-sualsız aparır.  Qardaşım məndən üç yaş balaca idi. Həmişə mənimlə dalaşanda çalışırdı ki, mənə özündən kəşf etdiyi fəndlərlə qalib gəlsin. Çox bacarıqlı idi. Hərbi məktəbə qəbul olanda hər ay evə xidmətdə, təlim-tərbiyədə fərqlənməyə görə təşəkkür məktubu gəlirdi. Biz hər sirrimizi bir-birimizlə bölürdük. İndi də sözüm olanda gəlirəm məzarının başına dərdləşirəm. Qardaşım belə özü öz qisasını alıb. Düşmənin iki yüksək rütbəli zabitini və 10 hərbçisini məhv edib. O, eyni zamanda yaralı yoldaşlarının da köməyinə çataraq onları xilas edib”, - deyə gözü dolmuş halda, baxışlarından qisas hiss edilən şəhidin qardaşı bildirib.

Mirsalam Cəfərov Talış istiqamətində gedən döyüşlərdə şəhidlik zirvəsinə ucalıb. Şəhidimizin nəşi 2016-cı il aprelin 11-də doğulub boya-başa çatdığı Tovuz rayonu Bayramlı kəndində torpağa tapşırılıb. Allah rəhmət eləsin.

Qeyd edək ki,şəhidin atası  2020-ci ildə vəfat edib.

Məlumatlar memorial.az saytından götürülüb.